الثقة اساس البيع في كل مكان, ولما تكون مشروع اون لاين جديد او مشروع قديم شغال في بيئة غير منظمة وفيها نصب دائم, صناعة الثقة بتصير صعبة جداً

في هذا المقال هدفي استكشف الطرق الي بتساعد تكسب ثقة الناس, طبق في مجالك ما يتناسب معك, هذا نتيجة ما تعلمته من التجربة او القراءة والبحث “بسم الله نبدأ”.

1) الانطباع الاول
تخيل نفسك شفت اعلان منتج بتبحث عنه, الفيديو جودته رديئة, موسيقى على صور المنتج والصفحة عليها ٢٠ متابع, هل ممكن انك تكمل وتطلب ؟ طيب لو كانت نفس الصفحة بشعار جميل وفيديو مرتب وشخص ظاهر بالفيديو بحكي عن المنتج بطريقة جميلة, شو الشعور الي رح يجيك؟

ركز على الانطباع الي تتركه عند الزبون لانه على اساسه باقي تصرفاته رح تكون

2) خليك صريح
اذا سالك الزبون سؤال يدل على عدم ثقته فيك (مثلا: الكم محل، فش ناس شرو من قبل…), كون واضح وحول الموضوع لصالحك, مثلاً قله احنا مشروع جديد, وانت اول زبون رح نعطيك خصم مدى الحياة ١٠ بالمية, او بما انك اول زبون خدمتك رح تكون مختلفة ومهتمين جدا نسمع تجربتك واحكيله عن القصة.
تذكر صديقك الي لما يسمع اسم مشهور بحكيلك كيف انه هو تابع هذا المشهور لما كان عنده ٢٠٠ متابع بس, الناس بتحب تكون جزء من قصص النجاح وبتحب الصدق.

3) تعامل مع المشاهير الصغار
الاعلانات الغير مباشرة مع المشاهير الي عندهم عدد قليل (مايكور انفلونسرز) رخيصة واسهل, وفي كتير من الاحيان نتائجها افضل. يعني ارسل منتجات لناس عدد متابعيهم قليل عملياً (يعني ٢٠٠٠ ل ١٠٠٠٠) هدول بالغالب ما بطلبو مقابل الاعلان بس بلزم تبعت منتج بطريقة مناسبة,

ومنهم رح تاخد ردود فعل ممتاز تشاركها على صفحتك وتحطه بال (highlight) في الانستغرام ورح يكون مؤثر لانه من صفحات عندها متابعين، غير انه ممكن يجيك طلبات منهم.

بس اكيد اختار ناس انتا متوقع انه متابعيهم ممكن يشترو منك، يعني ما بروح لحدا بحكي عن السيارات برسله ملابس نسائيه، بس ممكن ارسله اكل من المطعم .

4) اطلب الفيدباك
ما تستنى الناس تصور وتنشر، حاول اطلب الفيدباك بطريقة غير مباشرة او مباشرة. ممكن تبعت لاول الطلبات كرت بسيط وواضح انه مكتوب بخط اليد للشخص الي اشترى, عشان يكون متاكد انك متهم فيه، وومكن تضيف هدية وتحكيله بنحب نشوف رايك وتحكي للناس رايك.

وممكن تطلب منه على الرسائل يشارك فيدباك عنده، وما تضيع فيدباك: اذا كانت ستوري شاركها واحفظها، اذا كانت رسالة صورها الخ.

شجع الناس الي بتنشر عنك، يعني لما حدا يشارك فيدباك حلو عنك ممكن ترسله هدية وتفرجي الناس الموضوع بس بطريقة ذكية وغير مباشرة، يعني مثلا ممكن تعمل فيديو تحكي فيه: اليوم بدنا نغلف هديه حبينا نرسلها لزبون لانه اسعدنا كتير لما كتب عنا الكلام الحلو هاد على صفحته فحبينا نفاجئه. هيك باقي الزباين ممكن يتشجعوا يعملو فيدباك.

5) فرجي الناس كيف بتشتغل
صور تحضير الطلبيات، صور تغليف الطلبيات، صور تحميل الطلبيات. هذا المحتوى مش فيديو واحد وبس، هاد المحتوى فيديوهات كثيرة وحتى صور, منها بتحكي قصص.

وانتا بتصور الطلب ممكن تحكي قصة الزبون الي زعل منكم وصالحتوه, او الزبون الي طلبه غريب كتير ,او كيف انك بلشت مشروعك بعد ما زهقت من النصب الي بصير على الناس, خلي الناس تشوف انك موجود وحقيقي وانك بتشتغل وانك متهم بالشغل.

هذا الكلام لازم يكون دائم ومساحة الابداع فيه كتيرة: صور مثلا وانتا بترتب المخزن، او استشير المتابعين باختيار البضاعة الي بتشتريها، او او او…

وبكل هاد مش ضروري ابدا انه وجهك يبين وحتى في بعض الاحيان انه صوتك يطلع. في كتير امثلة وقصص نجاح بهاي الطريقة بدون ظهور.

6) دور على زبونك محل ما هو موجود
مش دايما افضل مكان هو الانستغرام، او الفيسبوك. ممكن زبونك موجود على منصات تانية ويكون الوصول اسهل عليها. يعني ممكن في جروب للناس الي بتحب الكومبيتور تكون موجود عليه وتوصل للناس هاي اسرع، او انك تكون على linkedin وتحكي مع الزباين المهتين هناك.

حتى ممكن يكون الموضوع على ارض الواقع بانك تشارك بتجمع معين او احداث بتصير حولينك.

7) اعطي عشان تاخد
اي حدا اعطاك معلومة مفيدة بالحياة وتركت فيك اثر انت بتوثق فيه، مهما كانت بسيطة. يعني الي علمك كيف تعمل اعلان ممول اول مرة وثقت فيه وتابعته، والي بعلمك كيف تصور وحسن تصويرك رح تتابعه.

في شخص بعرفه كان موجود على جروب متخصص بالالعاب واجهزة الجيمنج ، كان دايما اي حدا ينزل سؤال لمشكلة بجهازه او محتار مش عارف شو يشتري اي قطعه او بده يعمل تجميعة بس مش عارف يختار او بدور على قطعه معينة ومش لاقيها، كل هدول الناس كان يساعدهم ويعلق عندهم ويبحث معهم ويحكي معهم لحد ما يحلو الموضوع, بدون مقابل.

كان يصرف وقت بالساعات يوميا داخل الجروب لحد ما صار معروف عند كل هاي الناس، واي حدا بده يشتري اي اشي بالمجال دايما يرجعله. بعدها صار هو يبيع هاي الاجهزة.

برايكم هل محتاج يصنع ثقة من اول باب جديد ولا رح يبيع كتير من اول يوم؟ الي صار انه زرع وبعدها حصد.

8) حط حالك مكان الزبون
لو انتا مكانه بوضعك الحالي هل رح توثق فيك؟ اذا لا ليش ,وبلش امشي وحل هاي المشاكل، لانه في النهاية انتا اول زبون لنفسك.

نادر ما تكون بتبيع اشي انتا ما بتشتريه او مش مهتم فيه، ولو كنت غير هيك لازم تعدل هاد الموضوع وتحط حالك مكان الزبون وتفهمه اكتر واكتر حتى تقدر تختار المنتج الصح، تعطيه الثقة الي بدور عليها وتكون تفهم بالي بتبيعه حتى يكون واثق انه بتشري من ايد امينة.

9) فرجي اغلاطك متل ما بتفجري نجاحك
الناس بتحب الي زيها، ما في حدا فينا كامل، فما تحاول تعمل فيها بطل وانك احسن واحد وما بتغلط.

فرجي الناس غلطك، فرجي الناس فشلك، فرجي الناس التجارب السيئة. فرجيهم الطلب الراجع لانك طلعته ناقص. فرجيهم الطرد الي وصل الزبون فيه مشكلة لانك ما كنت مركز وكلفك توصيل نفس سعره عشان تبدله. فرجيهم لما مرة حكيتو مع زبون بطريقة غلط وكيف صلحتو الموقف.

فرجيهم البضاعة الي اشتريتها وبلشت تبيعها وبعدها اكتشفت انها نوعية سيئة وكيف تعلمت وحاولت تصلح موقفك.

خليك انسان اكثر واكثر حتى تقرب من الناس اكثر, لما الشخص يشوف شخص طبعيي وبشبه بقرب منه اكتر, ركز مع اغلب المؤثرين, بستعملو هاد الموضوع.

10) اربط حالك مع اشياء بتعطي الثقة:
الناس بتعرف الاشياء الي مستحيل تكون عند نصاب.
يعني شركات التوصيل الكبيرة ما بتتعامل مع اي متجر، صورهم لما يجيو عندك.
مش اي حدا بستاجر محل، صور محلك.
مش اي حدا بسجل علامة تجارية او اشي رسمي، فرجي انك مسجل ورسمي.
مش اي حدا بحط رقم واتساب، ضروري يكون عندك رقم تواصل.
مش اي حدا بستثمر بموقع الكتروني. مش اي حدا بقدر يفعل الدفع الالكتروني مع البنوك.
هاي الشغلات الي بملكها بكون مشي باشياء بتعرضه للمسائلة فتلقائيا الزبون رح يعطيك ثقة.

لما تشتري من صفحة الها ثلاث فروع بكل مدينة, غير عن انك تشتري من صفحة ما الها عنوان واسمها الفراشة الزقاء وصورتها مبينة مكررة.